काठमाडौं । जेनजी आन्दोलनका क्रममा प्रदर्शनकारीहरुको आक्रमणमा परेका नेपाली कांग्रेसका सभापति शेरबहादुर देउवा दम्पत्ति अहिले सैनिक अस्पतालमा उपचार भइरहेको छ ।
देउवाको टाउको पछाडी भाग र गर्धनमा गरी दुई ठाउँमा चोट लागेको र १२ वटा टाँका लगाइएको छ।
केन्द्रीय कार्यालय सानेपामा बसेको केन्द्रीय कार्यसम्पादन समिति बैठकपछि प्रचार विभाग प्रमुख मीनबहादुर विश्वकर्माले सभापति देउवा दम्पतीको स्वास्थ्य अवस्था सुधारोन्मुख रहेको जानकारी आएको बताए।
‘सभापतिज्यूले दिनुभएको जानकारीअनुसार टाउकोको पछाडीपट्टी गम्भीर चोट छ र त्यसमा करिब १२ वटा टाँका लगाइएको छ, त्योभन्दा तल गर्धनमा पनि चोट छ, दुवै चोट निको हुँदै गएको अवस्था छ, उहाँ सामान्य बोलचाल गर्नुहुन्छ, हिँड्नुहुन्छ,’ उनले भने।
सभापति देउवा पार्टीका साथीहरूसँग कुराकानी गर्ने अवस्थामा रहेको पनि उनले बताए। ‘उठ्दा चक्कर लाग्ने, बोल्दा असजिलो हुने देखिएकोले अझै केही दिन उपचारमै रहनुहुन्छ,’ उनले भने।
भदौ २४ गते जेनजी प्रदर्शनका क्रममा बूढानीलकण्ठस्थित घरमै रहेका देउवा दम्पतीमाथि प्रदर्शनकारीले आक्रमण गरी घाइते बनाएका थिए। नेपाली सेनाले उद्धार गरी उनीहरूलाई उपचारको व्यवस्था गरेको थियो।