काठमाडौं । तीन वरिष्ठ सहसचिव सचिव पदमा बढुवाका लागि सिफारिस भएका छन् ।
लोकसेवा आयोगका कार्यवाहक अध्यक्ष माधव बेल्बासेको अध्यक्षतामा बसेको सचिव बढुवा सिफारिस समितिको बैठकले वरिष्ठ सहसचिवहरू इन्दु घिमिरे, श्रीकृष्ण नेपाल र नारायणप्रसाद भट्टको नाम सचिव बढुवाका लागि सिफारिस गरेको हो ।
हाल प्रशासनतर्फ सात सचिव पद रिक्त रहेका छन् । रिक्त पदमा सचिव पदपूर्ति गर्ने प्रक्रिया अघि बढाउने क्रममा बढुवा सिफारिस समितिले पछिल्लो समय बैठकलाई तीव्रता दिँदै आएको छ ।
शुक्रबारको सिफारिसपछि अब मन्त्रिपरिषद् बैठकले तीनमध्ये एक जनालाई सचिवमा बढुवा गर्नेछ । सिफारिस सूचीको वरियताक्रममा पहिलो नम्बरमा इन्दु घिमिरे रहेकी छिन् ।
सचिव बढुवा सिफारिस समितिले सिफारिस गरेका नाममध्ये वरियताक्रममा पहिलो नम्बरमा रहेकालाई नै सचिवमा बढुवा गरेमा घिमिरे सचिव बन्नेछिन् । तर, तीन मध्ये जोसुकैलाई पनि सरकारले सचिव बढुवा गर्न भने बाधा पर्ने छैन ।
