ह्वात्तै बढ्यो काठमाडौं उपत्यकामा कोरोना संक्रमण, दैनिक पाँच सय हुँदै आएकोमा हजार नाघ्यो

काठमाडौँ उपत्यकामा पछिल्ला दिनमा कोरोना सङ्क्रमितको संख्या ह्वात्तै बढेर गएको छ । संक्रमित बढेसँगै उपत्यका कोरोनाको उच्च जोखिममा रहेको छ । यसअघि दैनिक पाँच/छ सयको हाराहारीमा सङ्क्रमित हुने गरेकोमा मङ्गलबार उपत्यकामा कोरोना सङ्क्रमितको सङ्ख्या बढेर एक हजार नाघेको छ । स्वास्थ्य तथा जनसङ्ख्या मन्त्रालयका अनुसार काठमाडौँमा मङ्गलबार ६७३ जना सङ्क्रमित थपिएका छन् ।

यस्तै भक्तपुरमा १४१ सङ्क्रमित थपिँदा ललितपुमा २१९ जना सङ्क्रमित एकैदिन थपिएका हुन् । मङ्गलबार काठमाडौँ उपत्यकामा मात्र एक हजार ३३ जना कोरोना सङ्क्रमित थपिएका हुन् । ११ हजार ५६५ जनाको पीसीआर तथा छ हजार १२४ जनाको एन्टिजेन विधिबाट गरी कुल १७ हजार ६८९ जनाको कोरोनाको नमुना परीक्षण भएको छ ।