काठमाडौं । कर्मचारी सञ्चय कोषका प्रशासक सिए जितेन्द्र धितालले कोषको तलबबाट मात्रै ४१ लाख भन्दा बढी बुझ्ने गरेका छन् ।
उनी कोष सञ्चालक समितिको सदस्य समेत रहेकाले प्रति बैठक आठ हजारका दरले बैठक भत्ता समेत बुझ्ने गर्छन् । कोषले उनलाई एउटा गाडी र चालक समेत सुविधा दिएको छ ।
यति मात्रै नभएर उनी झण्डै आधा दर्जन कम्पनीको सञ्चालक समितिमा समेत प्रतिनिधित्व गर्ने गरेका छन् । त्यहाँबाट पनि उनले बैठक भत्ताबाट सेवा सुविधा लिने गरेका छन् ।
आर्थिक वर्ष २०८०/८१ को प्रतिवेदन अनुसार उनी हाइड्रोइलेक्ट्रिसिटी इन्भेष्टमेण्ट एण्ड डेभेलोपमेण्ट कम्पनी, बेतन कणाली सञ्चयकर्ता हाइड्रोपावर कम्पनी, नेशनल फण्ड लि., विद्युत उत्पादन कम्पनी लिमिटेडलगायतमा कोषको तर्फबाट प्रतिनिधित्व गर्ने गर्छन् ।
कर्मचारी सञ्चयकर्ताहरुको बचत सुरक्षित बनाउनुपर्ने मुख्य जिम्मेवारी बोकेका उनले यति धेरै तलब सुविधा बुझ्ने गरेपनि कोष भने खराब कर्जाले थलिन थालेको छ ।
