काठमाडौं १७ जेठ
नेपाल सरकारले श्रीलंकाका बाढी पहिरो पीडितको सहयोगका लागि ५० हजार डलर अर्थात नेपाली ५१ लाख ८५ हजार रुपैयाँ बराबर सहयोग प्रदान गर्ने निर्णय गरेको छ ।
प्रधानमन्त्री निवास बालुवाटारमा बुधबार बसेको मन्त्रीपरिषदको बैठकले श्रीलंकामा बाढी पीडितका लागि ५० हजार डलर सहयोग गर्ने निर्णय गरेको हो ।
‘छिमेकी राष्ट्र श्रीलंकामा प्राकृतिक प्रकोप बाढी पीडितको सहयोगका लागि ५० हजार डलर दिने मन्त्रीपरिषदबाट निर्णय भएको छ’ सरकार प्रवक्ता तथा सुचना तथा सञ्चार मन्त्री राम कार्कीले भने ।
श्रीलंकामा यसै साता गएको बाढीका कारण २ सय भन्दा बढीको मृत्यु भएको छ । एजेन्सीहरुका अनुसार ९४ जना अझै हराईरहेका छन् ।
श्रीलंकाको विपत व्यवस्थापन केन्द्रका अनुसार ६ लाख २९ हजार ७ सय ४२ मध्ये १ लाख ६३ हजार ७ सय १ घरपरिवार प्रभावित बनेका छन् । बाढीका कारण १ हजार ५ सय ५ घर पूर्ण क्षति भएको छ भने ७ हजार ६ सय १७ घरमा आंशिक क्षति पुगेको छ ।
