काठमाडौं, १४ फागुन । संविधानसभाको उपाध्यक्षमा एकीकृत माओवादीकी सभासद ओनसरी घर्ती निर्वाचित भएकी छिन् ।
नया“ बानेश्वरमा बुधबार बसेको संविधानसभाको बैठकमा घर्तीलाई बहुमत संविधानसभा सदस्य संख्याले संविधानसभाको उपाध्यक्ष पदमा निर्वाचित गरेको हो ।
उपाध्यक्ष पदका लागि भएको निर्वाचनमा घर्तीले ४८४ मत हासिल गरिन् भने विपक्षमा ५ मत खसेको थियो । एमाओवादीकी उम्मेदवार घर्तीलाई कांग्रेस, एमाले, राप्रपा नेपाल, राप्रपासहित फोरम लोकतान्त्रिक, फोरम नेपाल, तमलोपा लगायत सबै मधेशी तथा साना दलले पनि समर्थन गरेका थिए ।
एमाओवादीकी उम्मेदवार घर्तीको प्रस्तावकमा एमाओवादी नेता कृष्णवहादुर महरा थिए भने समर्थकहरुमा कांग्रेसका आनन्द ढुंगाना र एमालेका भीम आचार्य रहेका थिए ।
संविधानसभा उपाध्यक्षका लागि नेपाल मजदुर किसान पार्टीकी अनुराधा थापाको पनि उम्मेवदवारी प्रस्तुत भए पनि चुनावी प्रक्रियामा समावेश भइनन् ।
मंगलवार उपाध्यक्षका लागि एमाओवादीका तर्फवाट घर्ती र नेमकिपाका तर्फबाट थापाको नाम दर्ता गरेको उम्मेदवारीलाई बुधवार बसेको संविधानसभाको बैठकमा निर्णयार्थ प्रस्तुत गरिएको थियो ।
संविधानसभाको अर्को बैठक फागुन २० गते मंगलवार विहान ११ बजे बस्ने छ ।
Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।