दिनेश/विवेक
जनवरी, ९ । गैर—आवासीय नेपाली संघ एनआरएन पोर्चुगलको आयोजनामा नयाँ बर्ष २०१४ को अवसरमा पोर्चुगलको राजधानी लिस्बनमा बृहत सांस्कृतिक कार्यक्रम हुने भएको छ । 
आपतकालिन अक्षयकोष स्थापना गर्ने उदेश्यले लिस्बोन स्थीत होटल सानामा यहि जनवरी १२ तारिखमा कार्यक्रम गर्न लागिएको हो । 
सांस्कृतिक कार्यक्रममा नेपालका चर्चित लोक गायक पशुपति शर्मा, रिता थापा मगर, हास्य कलाकार मनोज गजुरेल सहित स्थानिय कलाकारहरुले पनि आफ्नो प्रस्तुति दिन बताइएको छ ।
दिउसो २:३० बजेदेखि सुरुहुने सांस्कृतिक कार्यक्रमका लागि ७ युरो ९९ सेन्टको टिकटको ब्यवस्था गरिएको छ । 
पोर्चुगलमा आपत बिपतमा परेका नेपालीहरुको उद्धार तथा सहयोगार्थ अक्षयकोष स्थापना गर्न कार्यक्रमको आयोजना गरिएको गैर—आवासिय नेपाली संघ पोर्चुगलका अध्यक्ष रमेश कुमार गुरुङले जानकारी दिए । 
दुर्घटनामा परि ज्यान गुमाएका तथा अंगभंग भएका र गम्भीर प्रकृतिका स्वास्थ्य समस्या भएका नेपालीको परिवारलाई अलिकति भएपनि राहत पुगोस् भनेर परोपकारी कार्यको थालनी गर्न लागिएको भन्दै गुरुङले सहयोगका लागि सबैलाई अनुरोध समेत गरे ।  
केहिदिन अघि मात्रै पोर्चुगलमा एक नेपालीले झुण्डीएर आत्महत्या गरेका थिए । पोर्चुगलमा रहेका नेपालीहरुले ब्यक्तिगत रुपमा रकम संकलन गरी उनको दाहसंस्कारको ब्यवस्था मिलाएका थिए ।

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।