काठमाडौं । लगातार लकडाउनका कारण सर्वसाधरण समस्यामा परेपछि सरकारले अत्यावश्यक बाहेकका क्षेत्रमा पनि लकडाउन केही खुकुलो बनाउने तयारी थालेको छ ।
यसअघि मन्त्रीपरिषद बैठकले ३२ जेठसम्म लकडाउन घोषणा गरेपनि अवस्था अनुसार खुकुलो र कडाई गर्ने जिम्मा कोभिड–१९ रोकथाम तथा नियन्त्रण समितिलाई दिएको थियो । समितिले अहिले त्यसको तयारी गरिरहेको छ । अब अत्यावश्यक सेवाका अलावा नागरिकलाई पनि निश्चित नियम पालना गरी कामको सिलसिलामा आवतजावत गर्न दिने तयारी छ ।
सरकारले निजी सवारी साधन चल्न दिइने गरी नियम बनाउन लागेको हाे । जसअनुसार दुई पाङ्ग्रेमा एक र चार पाङ्ग्रेमा दुईजना मात्र यात्रा गर्न सक्ने गरी खोल्ने तयारी भएको हो । यस्तो नियम कहिलेदेखि लागू गर्ने भन्नेमा सरकार टुंगोमा पुगेको छैन ।
नयाँ मोडालिटी अनुसार विभिन्न क्षेत्र तोकेर कोरोना भाइरसको कम या बढी जोखिम टुंगो लगाइने छ । जोखिमको अवस्था हेरी लकडाउनमा आवतजावत गर्न दिने भएपनि कामबाहेक अनावश्यक हिडडुल गर्न भने पाइने छैन ।
सरकारले भारतसँगको सिमामा कडाई गर्ने तयारी गरिरहेकाे छ । २० वटा नाकाबाट मात्र आवतजावत गर्न पाइनेछ । तर, भारतबाट प्रवेश गरेपछि १४ दिन क्वारेन्टाइनमा अनिवार्य बस्नुपर्ने हुन्छ । सिमानाकामा सेना परिचालन गरिनेछ । सरकारले यसअघि नै १६ असारसम्म हवाई सेवा बन्द गर्ने निर्णय गरिसकेकाे छ । विस्तारै आन्तरिक हवाई सेवा सञ्चालनमा ल्याउने सरकारकाे तयारी छ ।
१ असारबाट शैक्षिक संघसंस्थाको पठनपाठन सुचारु हुने देखिएकाे छ । विद्यालय तथा शैक्षिक संस्थाले अनलाइन या दुरशिक्षा प्रणालीबाट पठनपाठन गराउनेछन् भने
विद्यालय खुल्ला भने हुने छैन ।
