भदौ ११ । विराटनगर क्षेत्रमा भारतीय सिमकार्ड प्रयोग गरी गैर कानुनी रुपमा संचालन गरिदै आएका कम्युनिकेशन सेन्टरहरुमा मोरङ प्रहरीले छापा मारी बन्द गराएको छ ।
सोमवार देखि शुरु गरिएको यो अभियान अन्तर्गत प्रहरीले विराटनगर १७ वडा नं.–७ र १७ संचालित ६ वटा कम्युनिकेशनहरुमा छापामारी उनीहरुले प्रयोग गरेको भारतीय सिमकार्ड, टेलिफोन सेट, तार, एण्टेना लगायतका सामग्री नियन्त्रणमा लिएको छ ।
यसरी अनधिकृत रुपमा संचालन भएका कम्युनिकेशन सेन्टरहरुबाट मासिक लाखौं रुपैया राजस्व छली हुने गरेको गुनासो आएपछि प्रहरीले छापा मारी संचालकलाई समेत पक्राउ गरी सार्वजनिक गरेको छ ।
प्रहरीले छापा मारेको टेलिफोन सेन्टरबाट एक दर्जन टेलिफोन सेट, भारतीय सिमकार्डहरु लगायत एण्टेना, चार्जर र तारहरु बरामद गरिएको मोरङ प्रहरीले जनाएको छ ।
विना दर्ता कम्युनिकेशन संचालन गरेका उनीहरु विरुद्ध दूर सञ्चार ऐन, राजस्व ऐन अनुसार कारवाही चलाईने प्रहरीले जनाएको छ ।