पुस २७ – नेकपा माओवादीको सातौँ महाधिवेशनको समूहगत छलफलमा सहभागी प्रतिनिधि तथा पर्यवेक्षकहरुले प्रचण्ड र बाबुरामलाई दस्तावेजमै गद्धार र नोकरशाही घोषणा गर्न माग गरेका छन् ।

छलफलमा सहभागी उनीहरुले क्रान्तिलाई धोका दिएकाले प्रचण्ड र बाबुरामहरुलाई नव संशोधनवादी भनेर मात्रै नपुग्ने भन्दै दस्तावेजप्रति गम्भीर असन्तुष्टि पैदा गरेका छन् ।

छलफलका सहभागीहरुले प्रतिवेदनमाथि धारणा गर्दै सहभागीहरूले तत्काल पार्टी जनयुद्धमा जानुपर्ने, जनयुद्धको जगमा जनविद्रोहको तयारीमा पार्टी लाग्नुपर्ने पनि सुझाव दिएका छन् ।

राजधानीमा जारी नेकपा–माओवादीको ७ औँ महाधिवेशन अन्तर्गत आज समूहगत छलफल सकिएको हो ।
सो समुहगत छलफलका सहभागीहरुले जनताका अधिकार स्थापनाका लागि पार्टीले क्रान्तिकारी कार्यदिशा पास गर्नुपर्नेमा बढी जोड दिएका हुन् ।

बन्दसत्रमा हिजो अध्यक्ष मोहन वैद्यले प्रस्तुत गरेको राजनीतिक प्रस्ताव र सचिव देवप्रसाद गुरुङले प्रस्तुत गरेको विधान प्रतिवेदनमाथि भएको समूहगत छलफल आज सकिएको छ ।

प्रतिवेदनमाथि छलफलका लागि हिजोको बन्दसत्रमा २१ वटा समूह बनाइएको थियो । ती २१ समूहका सदस्यले आफ्नो समूहमा आ–आफ्नो धारणा राख्ने क्रम आज सकिएको हो ।

छलफलको क्रममा आएका सुझाव र धारणाहरू समेटेर २१ वटा समूहका प्रमुखहरूले भोलिको बन्दसत्रमा आफ्नो समूहको संश्लेषित भनाइ राख्ने माओवादी प्रवक्ता पम्फा भुसालले जानकारी दिइन् ।

पुस २५ गतेदेखि सुरु भएको महाधिवेशन पुस २९ गतेसम्म चल्नेछ । महाधिवेशनले पार्टीको कार्यदिशाका साथै नयाँ नेतृत्वसमेत चयन गर्नेछ ।

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।