निःशुल्क बिजुलीको योजना कार्यान्वयनतर्फ, मंसिरदेखि २० युनिटसम्म निःशुल्क पाइने

काठमाडौं १० कात्तिक । सरकारले २० युनिटसम्म विद्युत खपत गर्ने ग्राहकलाई निःशुल्क बिजुली उपलब्ध गराउने योजना कार्यान्वयनतर्फ अघि बढेको छ । ऊर्जा, जलस्रोत तथा सिँचाइमन्त्री पम्फा भुसालले २० युनिटसम्म बिजुली बाल्नेलाई निःशुल्क उपलब्ध गराउने योजना लिएकोमा अब त्यसको कार्यान्वयन हुन लागेको हो ।

मन्त्री भुसालले मंसिर १ गतेदेखि २० युनिटसम्मको बिजुली बाल्नेहरूलाई निःशुल्क दिने र डोमेस्टिक कन्जम घटेको महशुल र सिंचाईमा घटेको महशुल लागू हुने जानकारीसमेत दिएकी छन्।

मन्त्री भुसालले विद्युतीय यातायातलाई सरकारले बढावा दिने बताएकी छन्। उनले मंगलबार काठमाडौंमा महिन्द्राद्वारा आठ लाख ४० हजारको ट्रियो इलेक्ट्रिक अटो सार्वजनिक कार्यक्रममा विद्युतीय यातायातलाई सरकारले बढावा दिने बताएकी हुन्। उनले आजसम्म नेपालीलाई चाहिने जलविद्युतको पर्याप्त उत्पादन गरिसकेको बताउँदै अबको बाटो आफ्नै देशमा विद्युतीय सवारीसाधनसहित विद्युतीय सामानहरू बढाउने रहेको बताइन्।

मन्त्री भुसालले असन्तुलित अर्थतन्त्रलाई सन्तुलित बनाउन विद्युतीय सवारी साधनहरुले सहयोग गर्ने पनि स्पष्ट पारिन्। विद्युतीय सवारी साधनले रोजगारीमा पनि सहयोग पुग्ने बताउँदै उनले विद्युतीय सवारीलाई बढावा दिन अब काठमाडौं उपत्यकाका सरकारी कार्यालयहरूमा र उपत्यकामा चल्ने सबै सवारीसाधनहरू विद्युतीय खरिद गर्ने नीति सरकारले ल्याएको बताइन्।

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।