काठमाडौं २६ असार । दुई व्यक्ति दुई वटा साइकलमा सवार हुन्छन् । विपरित दिशाबाट सवार एउटा कारबाट दुई व्यक्ति झरेर एउटा साइकलमा सवार व्यक्तिलाई बंक्सिंगले हानेर सडकमा लडाउँछन् । उनी रगतामम्मे हुने गरी सडकमा पछारिन्छन् । लगत्तै उनलाई घिसारेर छेउमा ल्याएर छाडिन्छ । हो त्यहीँ घटनाको भिडियो अहिले सामाजिक सञ्जालमा भाइरल छ । मानवको नाममा क्रुरता देखाएको भन्दै तत्काल कारबाही गर्न माग भइरहेको छ ।
घटना विराटनगरको हो । साइकल यात्रीलाई अमानवीय तरिकाले कुटपिट गरेको आरोपमा एक जना पक्राउ समेत परिसकेको प्रहरीले जनाएको छ । घटनामा संलग्न अरु २ जना फरार रहेकाले उनीहरुको खोजी भइरहेको प्रहरीले जनाएको छ ।
असार २० गते राति साढे ८ बजेतिर विराटनगरको दुधफारमस्थित कोशी राजमार्गमा साइकल चालक पवन साहलाई विपरीत दिशाबाट कारमा आएकाहरुले अमानवीय तरिकाबाट कुटपिट गरेको भिडियो सार्वजनिक भएको थियो ।
साहलाई कुटपिट गर्नेमा बा १५ च ३४४५ नम्बरको कारमा सवार वर्ष १९ को आयुष भेटुवाल, १८ को कुशल भेटुवाल र जिल्ला तेह्रथुम घर ठेगाना भएका वर्ष ३० का रोशन कार्की रहेका र त्यसमध्ये आयुषलाई २१ गते नै पक्राउ गरी ज्यान मार्ने उद्योगमा म्याद थप भई कानुनी कारबाही अगाडि बढाइएको प्रहरीले जनाएको छ । फरार भएका कुशल र रोशनको खोजतलास जिल्ला प्रहरी कार्यालय मोरङबाट भइरहेको प्रहरीले जनाएको छ ।
