काठमाडौं । राजावादीहरुको गत चैत १५ गते काठमाडौंको तीनकुने क्षेत्रमा प्रदर्शनका क्रममा भाटभटेनीमा लुटपाटमा नेपाली कांग्रेसका एक सहमहामन्त्रीका छोरा पनि संलग्न रहेको खुलेको छ ।
सो दिन भाटभटेनी सुपरस्टोर लुटपाट र तोडफोडपछि सीसीटीभी फुटेज र टिकटक भिडियोको आधारमा समातिएकामध्ये एकजना नेपाली कांग्रेसका सह–महामन्त्री महेन्द्र यादवका छोरा पनि भाटभटेनीमा लुटपाटमा संलग्न रहेको खुलेको हो ।
शुक्रबार राष्ट्रिय प्रजातन्त्र पार्टीका अध्यक्ष राजेन्द्र लिङ्देनले उक्त प्रकरणलाई संघीय संसद्को वर्षे अधिवेशनको पहिलो बैठकमा उठाएका छन् । अध्यक्ष लिङ्देनले सदनमा ती सह-महामन्त्रीका छोरालाई गृहमन्त्री रमेश लेखकले तुरुन्तै छाड्न जिल्ला प्रहरी परिसर काठमाडौंका प्रमुख एवम् एसएसपी विश्वराज अधिकारीलाई दबाब दिएको पनि उल्लेख गरेका छन् ।
उक्त बैठकलाई राप्रपाको तर्फबाट सम्बोधन गरेका लिङ्देले कांग्रेसका भाटभटेनी लुटपाटमा संलग्न सह-महामन्त्री पुत्रलाई माथिको दबाबमा छाडिएको प्रमाण पनि आफूकहाँ आइपुगेको बताए । लिङ्देनले कांग्रेस सह-महामन्त्री मात्रै भने तर उनले यादवको नाम लिएनन् ।
गृहबाटै सहमहामन्त्रीका छाेरालाई छाड्न दबाब आएपछि प्रहरीले अरूलाई हिरासतमा राखेपनि उनलाई मुद्दा प्रक्रियामा नलगी छाडिदिएको पाइएकाे हाे ।
लिङ्देनको प्रश्न, ‘सहमहामन्त्रीका छोरा पक्राउ गरेर किन छाड्नुभयो तुरुन्तै ?‘
राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले शुक्रबार प्रतिनिधिसभा बैठकमा पार्टीको तर्फबाट सम्बोधन गर्ने क्रममा भाटभटेनी सुपरमार्केटमा भएको लुटपाटमा सहमहामन्त्रीका छोरा पक्राउ परेको र माथिकाे दबाबमा प्रहरीले तुरुन्तै छाडिदिएको जिकिर गरे ।
‘हामीसँग रेकर्ड छ, गृहमन्त्रीज्यू । भाटभटेनीको लुटपाटमा तपाईंकै पार्टीको सहमहामन्त्रीको छोरा पक्राउ परेका छन्,’ उनले भने, ‘किन छाड्नुभयो तुरुन्तै ?’
सहमहामन्त्रीका छोरासँगै गएका अर्का व्यक्तिले भाटभटेनीबाट कपडा लिएर गएको पनि उनले बताएका छन् । ती कपडा लिएर जाने व्यक्तिले कुरा खोलिदिने भनेर धम्क्याएपछि उनलाई पनि दुई घण्टामा नै प्रहरीले छाडेको लिङ्देनेको दाबी छ ।
