काठमाडाैं । बाम तथा अर्थ विश्लेषक हरि रोकाले आगामी २१ फागुनमा हुने प्रतिनिधिसभाको निर्वाचनमा खोटाङबाट उम्मेदवारी दिएका छन् ।
नेपाली कम्युनिष्ट पार्टीको तर्फबाट उम्मेदवारी दिएका रोकाले कृषकहरुको आवाज बनेर आफूले उम्मेदवारी दिएको बताएका छन् ।
‘म चार वर्षदेखि गाउँमै कृषि गरिरहेको मान्छे हुँ, मेरो मन बदलिएको छैन अहिले पनि म किसान नै हुँ,’ उम्मेदवारी दिएपछि उनले भने, ‘अहिले म कृषकहरुको माझमा बसेर हलो कोदालो चलाइरहेको छु, मेरो उम्मेदवारी कृषकहरुकै पक्षमा हुनेछ ।’
रोकाले हामीले कस्तो खालको कृषि गरियो भने उन्नती हुन्छ र कस्तो नीति चाहिन्छ भनेर आफूले अनुभव गरिरहेको बताउँदै जितेपछि कृषककै पक्षमा जहिले पनि बोल्ने र लागिरहने समेत बताएका छन् ।
उनले सामान्य किसानहरुसँग मिल्न र उनीहरुको भावना बुझ्न भनेरै आफूले पिएचडी गरेपनि डा. नलेखेको समेत बताए । ‘म सामान्य किसान जस्तै भएर बाँचौ भन्ने हो, डा. लेखेर सामान्य किसानसँगको दुरी नबढोस् भनेरै मैले नामको अगाडी अहिलेसम्म डा. लेखेको छैन ।’ उनले भने ।
खोटाङमा दुई स्वतन्त्रसहित १३ जनाको उम्मेदवारी परेको छ । नेकपाबाट रोकाले उम्मेदवारी दिँदा नेपाली कांग्रेसबाट वीरकाजी राई र नेकपा एमालेबाट देवविक्रम राईले उम्मेदवारी दिएका छन् ।
खोटाङमा नेकपा, कांग्रेस र एमालेबीच त्रिपक्षिय कडा प्रतिस्पर्धा हुने देखिएको छ ।
