काठमाडौँ, २२ जेठ । प्रधानमन्त्री पुष्पकमल दाहाल ‘प्रचण्ड’ले नैतिक बलका साथ निश्चित लक्ष्य तय गरेर अगाडि बढ्ने हो मुलुकको आर्थिक समृद्धि र विकासका लागि लामो समय कुर्नु नपर्ने बताएका छन् ।

प्रधानमन्त्री तथा मन्त्रिपरिषद् कार्यालयमा आज आयोजित बिदाई कार्यक्रमलाई सम्बोधन गर्दै उनले आफ्नो नेतृत्वको सरकारले संविधान कार्यान्वयन र आर्थिक वृद्धिको क्षेत्रमा गरेको सकारात्मक प्रयास आगामी दिनका लागिसमेत प्रेरणाको स्रोत हुने बताए ।

आफू प्रधानमन्त्री बन्दा संविधान कार्यान्वयन होला कि नहोला, मधेस केन्द्रित दल स्थानीय तहको निर्वाचनमा आउलान् कि नआउलान् भन्ने खालका आशङ्का कायम रहेको भए पनि सकारात्मक पहलले सकारात्मक नतिजा प्राप्त भएको उनको भनाइ थियो ।

मधेस केन्द्रित दललाई संविधान स्वीकार गर्ने अवस्थामा ल्याइपु¥याइएको, संविधानको सर्वस्वीकार्यता बढेको, पहिलो चरणको स्थानीय तहको निर्वाचन सम्पन्न भएको उल्लेख गर्दै प्रधानमन्त्रीले भने, “मुख्य विषय राजनीतिक नेतृत्वले मुलुकलाई कसरी निकास दिने र गुणात्मक रुपमा आर्थिक समृद्धि कसरी हासिल गर्ने भनेर केन्द्रित भयो भने प्रतिफल दिन सकिन्छ भन्ने पछिल्लो दश महिनाले आम जनतामा सकारात्मक धारणा स्थापित गरिदिएको छ ।”

सबै राजनीतिक शक्तिलाई एकै ठाउँमा ल्याउने, मधेस, पहाड, हिमाल बीचमा एकता बनाइराख्न आफू र आफ्नो नेतृत्वको सरकार सफल भएको प्रधानमन्त्रीको भनाइ छ । स्थानीय तहको दोस्रो चरणको निर्वाचन बाँकी भए पनि त्यसको आधारशीला खडा भएको, प्रदेश तथा केन्द्रीय संसद्को निर्वाचन हुने वातावरण पनि बनेको भन्दै उहाँले स्थानीय तहमा पुगेको अधिकार हालसम्मकै सबैभन्दा ठूलो उपलब्धि भएको बताए ।

प्रधानमन्त्रीले भने, “२००७ सालदेखि भएका क्रान्ति, जनआन्दोलन, जनयुद्ध हेर्दा यस पटक गुणात्मक र प्रभावकारी काम भएको छ । नयाँ संरचना बनाउँदा केही समस्या त जरुर आउँछ तर त्यसलाई सम्बोधन गरेर जान सकिन्छ भन्ने विश्वास पैदा भएको छ ।”

दुई ठूला छिमेकी मुलुकसँग सन्तुलित सम्बन्ध कायम राख्न सकिएको, ‘एक पेटी एक मार्ग’ (ओबिओर) मा हस्ताक्षर भएको, काठमाडौँ–तराई मधेस द्रुतमार्गको निर्माण प्रक्रिया सुरु भएको, हुलाकी राजमार्ग निर्माणले गति लिएको र महाकालीमा पुल निर्माण तथा अन्य विकास निर्माणका कामसमेत प्रभावकारी तवरले भएको भन्दै प्रधानमन्त्रीले सन्तोष व्यक्त गरे ।

विद्युत्भार कटौतीको अन्त्यसँगै आर्थिक वृद्धिदर २५ वर्षपछि उच्च स्थानमा पुग्नु सफलताको अर्को सूचक रहेको भन्दै प्रधानमन्त्री दाहालले विगतमा के होला, कसो होला भनेर गरिएका सबै प्रकारका आशङ्का विश्वासमा परिणत भएको स्पष्ट पारे ।

आफ्नो नेतृत्वको सरकारलाई सफल बनाउन मुख्य सचिवको विशेषज्ञाले पनि काम गरेको भन्दै प्रधानमन्त्रीले स्थायी सरकारका रुपमा रहेको कर्मचारी प्रशासनले पनि जनताको पक्षमा काम गर्ने वातावरण पैदा भएकामा खुसी व्यक्त गरे ।

प्रधानमन्त्रीले भने, “हाम्रा कर्मचारीतन्त्र सक्षम छ, पारदर्शी पनि छ । राजनीतिक नेतृत्वले नैतिक बलका साथ काम ग¥यो भने सफल बनाउन लाग्छ भन्ने पनि देखिएको छ ।” उनले आज बिदाइ गरे पनि आफ्नो पार्टी र नेतृत्व पुनः सरकारमा आउने भएकाले स्वागत गर्ने तयारी गर्न कर्मचारी प्रशासनलाई आग्रह गरे ।

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।