काठमाडौं ३० फागुन
मेची–महाकाली अभियानका क्रममा राजधानी बाहिर रहेका नेकपा एमाले अध्यक्ष केपी शर्मा ओलीले अभियान नै छाडेर सोमबार प्रधानमन्त्री पुष्पकमल दाहाल प्रचण्डसँग भेट गरेका छन् ।
मेची–महाकाली अभियानमा राजधानी बाहिर रहेका ओली आकस्मिक रुपमा काठमाडौं फर्किएर प्रचण्डसाग भेट गरेका हुन् । प्रधानमन्त्री निवास बालुवाटारमा दुई नेताबिच मात्रै झण्डै एक घण्टा भेटवार्ता भएको थियो ।
प्रधानमन्त्रीका प्रेस सल्लाहकार गोविन्द आचार्यले दुई नेताबिच पछिल्लो राजनीतिक अवस्था, संविधान संशोधन तथा निर्वाचनका विषयमा छलफल भएको र छलफल सकरात्मक भएको बताए । ‘ समसामयिक विषय, संविधान संशोधन, स्थानीय तहको निर्वाचनलगायत विषयहरुमा उहाँहरुबीच छलफल भयो,’ आचार्यले भने, ‘छलफल सकरात्मक भएको छ ।’
एमालेले सुरु गरेको मेची महाकाली अभियान अन्तर्गत जितपुरको कार्यक्रममा ओलीसँग होली मनाउन आग्रह गर्दै एमाले कार्यकर्ताले आफ्ना समर्थकलाई बोलाएका थिए । तर, ओली एक्कासी काठमाडौं आएसँगै ओलीको अनुपस्थिति रहेपछि एमाले नेताहरुले अब चुनावपछि ओलीलाई ल्याउने प्रतिवद्धता जनाउँदै समर्थकहरुसँग माफी मागेका थिए ।
