निर्वाचन विरोधको कुनै दम छैन : उपप्रधानमन्त्री महरा

दाङ, १२ फागुन । उपप्रधान एवम् अर्थमन्त्री कृष्णबहादुर महराले चुनावको वातावरण बनाउन सहयोग गर्न सञ्चारकर्मीहरूलाई आग्रह गरेका छन् ।

नेपाल पत्रकार महासंघ दाङको २४ औ साधारण सभा तथा १० औ अधिवेसनको बिहिबार उद्घाटन गर्दै उनले लामो समयपछि स्थानीयतहको निर्वाचन हुन थालेकाले त्यसका लागि वातावरण बनाउन पत्रकारहरूलाई आग्रह गरे ।

अर्थमन्त्री महराले लामो समयदेखि स्थानीयतहको निर्वाचन हुन नसक्दा जनताले आफ्नो जनप्रतिनिधि पाउन नसकेको बताउँदै भने, “निर्वाचनको वातावरण बनाउने तपाईहरूको दायित्व र कर्तव्य हो । संविधान कार्यान्वयनका लागि पनि चुनाव अपरिहार्य छ ।”

मन्त्री महराले अहिले मधेसवादी दलले गरेको निर्वाचनको विरोधको कुनै अर्थ नभएको बताए । उनले भने , “अहिले भएको निर्वाचनको विरोधको कुनै दम छैन, केही दिनमा नै यस प्रकारको आन्दोलनको अन्त्य हुने छ” ।