भदौ १९ । सामाजिक व्यवहार सुधार ऐन, २०३३ अनुसार अख्तियार दूरुपयोग अनुसन्धान आयोगले निर्देशन जारी गर्दा हाल संचालनमा रहेका क्याटेरिङग, पार्टी प्यालेस तथा इभेन्ट व्यवस्थापन व्यवसाय धरासायी भएको सरोकारबाला व्यवसायीहरुले गुनासो गरेका छन् ।

उनीहरुले त्यस ऐन हालको अवस्थामा अव्यवहारीक भएको र आयोगले विभिन्न स्थानमा आयोजित कार्यक्रममा हस्तक्षेप गरेको प्रति गंभिर ध्यानाकर्षण भएको जनाएका छन् । इभेन्ट एण्ड भेन्यू एसोसियसन अफ नेपाल, ललितपुर रेन्टल, क्याटेरिङग एण्ड पार्टी प्यालेस संघ, भक्तपुर क्याटेरिङग एण्ड पार्टी प्यालेस संघ, होटल एशोसियसन महासंघ तथा रेवानद्धारा संयुक्तरुपमा आयोजना गरिएको पत्रकार सम्मेलनमा उनीहरुले ऐन अनुसारको निर्देशन खारेज हुनुपर्ने माग गरेका छन् ।
कार्यक्रममा इभेन्ट एण्ड भेन्यू एसोसियसनका अध्यक्ष श्रीमान सिंह श्रेष्ठले हजारौ व्यक्तिहरुलाई रोजगार दिएको तथा विभिन्न क्षेत्रको व्यापार प्रबद्र्धन गरिरहेको समयमा आयोगले जारी गरेको निर्देशनले त्रास सिर्जना गरेको बताए । उनले अहिलेको समयमा ५१ जनाभन्दा कम सहभागी मात्र गराएर कार्यक्रम गर्दा व्यवसाय नै धरासायी भएको गुनासो गरे ।
 व्यवसायीहरुले सामाजिक सुधारको त्यस ऐनमा संसोधन गरिनुपर्ने तथा आयोगको निर्देशन  अनुसारको हस्तक्षेप नरोकिए व्यवसायको साचो सरकारलाई बुझाउने चेतावनी दिएका छन् । व्यवसायीहरुले हालको अवस्थामा सामाजिक व्यवहारमा निकै परिवर्तन आएको भन्दै ३७ वर्ष पुरानो ऐन संसोधन नगरी कार्यान्वयन गर्न नसकिने बताएका छन् ।

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।