भदौ ६ । (रासस) एमाओवादीका अध्यक्ष पुष्पकमल दाहालले शान्ति सम्झौता र अन्तरिम संविधानविपरीत गएर द्वन्द्वकालीन मुद्दा ब्युँताउन खोजिए आफ्नो पार्टीले विद्रोह गर्ने बताएका छन् । पार्टी सम्बद्ध योङ कम्युनिस्ट लिग नेवाः राज्य समितिले आयोजना गरेको युवा प्रवेश तथा प्रशिक्षण कार्यक्रमलाई बुधबार सम्बोधन गर्दै उनले द्वन्द्वकालीन मुद्दा ब्यँताउने र लोकप्रिय उम्मेदवारलाई निर्वाचनमा भाग लिन नदिने षड्यन्त्र भयो भने विद्रोह हुन्छ भने ।
सत्यनिरुपण तथा मेलमिलाप आयोगमार्फत टुंग्याउनुपर्ने द्वन्द्वकालीन मुद्दालाई हल गर्नुपर्नेमा त्यसो नगरी परम्परागत ढंगले कारबाही गर्न खोजिए त्यो नेपाली जनतालाई स्वीकार्य नहुने उनको भनाइ थियो । अग्रगामी शक्तिको दुई तिहाई बहुमत संविधानसभामा नहुँदा संविधानसभाले संविधान निर्माण नगर्दै भंग भएको दृष्टान्त प्रस्तुत गर्दै उनले यस पटकको निर्वाचनमा अग्रगामी शक्तिलाई दुई तिहाइ मत दिलाउने गरी तयारी गर्न युवालाई निर्देशन दिए ।
यसै गरी एमाओवादीका नेता डा.बाबुराम भट्टराईले विगतमा जस्तै वाईसीएलले निर्वाचन सफल पार्न विशेष भूमिका खेल्नुपर्ने आवश्यकता औँल्याउँदै एमाओवादीलाई मुलुकभर विजय गराउन सबै पार्टी पङ्क्ति परिचालित हुनुपर्नेमा जोड दिए । उनले क्रान्ति आंशिक रूपमा पूरा भए पनि जनवादी क्रान्तिको बाँकी कार्यभार पूरा गर्ने दिशामा पार्टी अगाडि बढिरहेको बताए । द्वन्द्वकालीन मुद्दाहरू ब्युँताइए एमाओवादी हातमा दही जमाएर नबस्ने चेतावनी दिँदै उनले त्यस्ता मुद्दामा एकजना मात्रै नेता तथा कार्यकर्ता पक्राउ परे परिस्थिति फरक ढंगले अगाडि बढ्ने बताए ।