साउन ३ । नेपाली काँग्रेसका वरिष्ठ नेता शेरबहादुर देउवाले नेपालका लागि छिमेकी मुलुक भारत, चीनलगायत अरु मित्रराष्ट्रहरुसँग सन्तुलन बनाई राख्ने परराष्ट्र नीतिको आवश्यकता रहेको बताएका छन् ।
विपी चिन्तन प्रतिष्ठानद्वारा आज यहाँ आयोजित विचार गोष्ठीको उद्घाटन गर्दै नेता देउवाले दुई शक्ति राष्ट्र भारत र चीनबाट घेरिएको भूपरिवेष्ठित राष्ट्र नेपालले जल सम्पदाको समुचित प्रयोगबाट आर्थिक उन्नति गर्न ध्यान दिनुपर्ने बताए ।
उनले देशको स्वाधीनता र आर्थिक, सामाजिक उन्नतिका लागि जननिर्वाचित सरकारले धेरै काम गर्न सक्ने भएकाले संविधानसभाको निर्वाचनमा ध्यान केन्द्रित गर्न सबैसँग आग्रह गरे ।
नेता देउवाले भने– “संविधानसभाबाट बन्ने संविधानबाटै सबै कुरा निक्र्यौल हुनेछ । नेकपा–माओवादी पनि वार्ता गरी चुनाव आउनुको विकल्प छैन ।”
कार्यक्रममा राप्रपाका नेता डा. प्रकाशचन्द्र लोहनीले राष्ट्रिय हित र सीमा सुरक्षामा चनाखो हुँदै मित्रराष्ट्रका स्वार्थलाई राम्ररी आँकलन मात्र गर्न सके पनि राष्ट्रिय जोगाउन कठिन नभएको विचार राखे ।
नेकपा (एमाले)का नेता घनश्याम भुसालले राष्ट्रिय हितका सवालमा राजनीतिक दलहरू एकीकृत हुनुपर्ने र गरिबीकै कारण पनि राष्ट्रियता कमजोर बनेका कारण देशलाई आर्थिक निर्भरतातर्फ लैजाने नीति, कार्यक्रम, कार्ययोजना र कार्यान्वयनको प्रतिबद्धता आवश्यक रहेको बताए ।
मधेसी जनअधिकार फोरम (नेपाल)का अध्यक्ष उपेन्द यादवले मधेसी, महिला, दलित र पिछडिएको वर्गलाई क्षमता विकासका लागि अवसर दिनुपर्ने पहिलो आवश्यकता रहेको तर्क राखे ।
विपी चिन्तन प्रतिष्ठानका सभापति हरिबोल भट्टराईको अध्यक्षतामा भएको विचार गोष्ठीमा नेपालको राष्ट्रियता र परराष्ट्र नीतिका विषयमा प्रा. जयराज आचार्य र प्रजातान्त्रिक समाजवाद तथा यसको सान्दर्भिकताका विषयमा डा. रामप्रसाद ज्ञवालीले कार्यपत्र प्रस्तुत गरेका थिए ।