असार ३० । मेगा बैंकले सर्वसाधारणमा जारी गरेको सेयरको बाँडफाँड गरेको छ । जस अन्तर्गत १ लाख ४४ हजार ४ सय ५६ जनालाई ६९ करोड ९० लाखको सेयर वितरण भएको छ ।
बैंकले साना लगानीकर्तालाई ६ दशमलव ३१ प्रतिशत र ठूला लगानीकर्तालाई ३ दशमलव ६७ प्रतिशतका दरले सेयर बाँडफाँड गरेको छ ।
५० कित्ता शेयरका लागि ११ हजार ३ सय ३६ जनाले आवेदन दिएकोमा चिठ्ठामार्फत ३ हजार ४ सय ७४ जनाले सेयर प्राप्त गरेका छन् ।
एक सय ५० कित्ता सेयरका लागि ३ हजार ५ सय ९ जनाले आवेदन दिएकोमा जम्मा ३ हजार २ सय २५ जनाले मात्र सेयर प्राप्त गरेका छन् ।
धितोपत्र बोर्डको नियमअनुसार १५० कित्ताभन्दा कम आवेदन गर्नेलाई ४० प्रतिशत सेयर बाँडफाँट गर्नुपर्छ । त्यसमध्ये सबै आवेदकलाई सेयर बाँडफाँट गर्दा १० कित्ताभन्दा कम पर्ने भएपछि चिठ्ठामार्फत कम्तीमा १० कित्ता पाउने गरी सेयर बाँडफाँड गरिएको थियो ।
१५० कित्ताभन्दा कम आवेदन गर्ने सबैलाई १० कित्ताको दरले सेयर दिइएको छ ।
ठूला लगानीकर्ता सबैले आवेदनको अनुपातअनुसार सेयर प्राप्त गरेका छन् । सबैभन्दा बढी २ लाख कित्तामाथि आवेदन गर्नेले ७ हजार ३ सय कित्ता सेयर पाएका छन् ।
त्यस्तै, एक लाख आवेदन गर्नेले ३ हजार ६ सय ५३ कित्ता र ५० हजारको आवेदन गर्नेले १ हजार ८ सय २५ कित्ता सेयर पाएका छन् ।
गत जेठ १९ गतेदेखि २२ गतेसम्म सर्वसाधारणका लागि शेयर निष्कासन खुल्ला गरिएकोमा एक लाख ६० हजार ५ सय २४ जनाले आवेदन गरेका थिए । सर्वसाधारणको लागि ६९ करोड ९० लाख रुपियाँ बराबरको ६९ लाख ९० हजार कित्ता साधारण शेयर छुट्याइको थियो । आवेदन दिएमध्ये २ सय २८ जनाको एक लाख २० हजार ४ सय ३७ कित्ता सेयर आवेदन रद्द भएको छ ।
१४ अर्ब रुपैंया अर्थात २२ गुना भन्दा बढी आवेदन परेको बैंकले जनाएको छ ।