जेठ २१ । बलिउडमा नाम र दाम राख्न सफल गजिनि, हासउफुल जस्ता चलचित्रमा अभिनय गरिसकेकी अभिनेत्री जिया खानले आत्महत्या गरेकी छन् ।

जियाले गएराती ११ बजे आफ्नै फ्ल्याटमा आत्महत्या गरेको प्रहरीलाई उदृत गर्दै भारतीय सञ्चारमाध्यमहरुले उल्लेख गरेका छन् ।
मुम्बईको जुहुमा बस्दै आएकी २५ वर्षिय उनले झुण्डिएर आत्महत्या गरेको प्रहरीले जनाएको छ ।

बेलायतमा हुर्किएर केही समययता भारतमा बस्दै आएकी उनले के कारणले आत्महत्या गरिन् भन्नेबारे भने खुल्न सकेको छैन ।

उनी २००७ देखि चलचित्र निशब्दमार्फत बलिउड यात्रामा प्रवेश गरेकी थिइन् । उक्त चलचित्रमा उनले नायक अमिताभ बच्चनसँग समेत भूमिका निभाएकी थिइन् ।

आत्महत्यास्थलमा जियाको कुनै पनि सुसाइड नोट नभेटिएको प्रहरीले जनाएको छ । तर जियाले केही समय यता विभिन्न कारण तनाव झेल्दै आएको बताइएको छ ।

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।