असोज २५ – सिरहा पोखरभिण्डा–२ का दलित छात्रासँग अवैध सम्बन्ध राखेका शिक्षकले क्षतिपूर्ति स्वरूप रु एक लाख ५० हजार तिरेपछि मिलापत्र भएको छ ।

स्थानीय डोमी उच्च माविमा कार्यरत शिक्षक विष्णुदेव साहले सोही विद्यालयमा अध्ययनरत छात्रालाई तीन वर्षदेखि अवैध सम्बन्ध राख्दै आएका थिए । गर्भ रहेको ६ महिनापछि गत भदौ ४ गते भारतको बिहार राज्यमा पर्ने जयनगरबजार लगी गर्भपतन गराएपछि यो रहस्य खुलेको थियो ।

शिक्षक साहले रु एक लाख ५० हजार तिरेपछि समाजका केही अगुवा व्यक्तिले घटना मिलाइदिएको स्थानीयवासीले बताएका छन् ।

विष्णुपुरकट्टी घर भएका शिक्षक साहले जागिर लगाइदिने लोभ देखाएर दलित छात्रासँग यौन सम्बन्ध राख्दै आएको बताइन्छ । गर्भ बसेको रहस्य खुलेपछि शिक्षक साह विद्यालय जानसमेत छाडेर तीन हप्तासम्म सम्पर्कविहीन रहेका थिए ।

पोखरभिण्डा गाउँमा एक घर परिवारमात्र रहेका पीडितका बुबालाई पीडकहरूले दबाब दिएका कारण प्रशासनसम्म पुग्न नसकेको अधिकारकर्मीहरूले बताएका छन् । अधिकारकर्मी देवराज पोखरेलले भने— “असुरक्षाका कारण पीडित प्रशासनसम्म पुग्न सकेनन् । हामीले के गर्ने ?”

पीडितलाई पटकपटक प्रशासनमा उजुरी दर्ता गराउन भनिए पनि नमानेको उनको भनाइ छ । रासस

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।