असोज १९ – वैदेशिक रोजगारीका लागि मलेसिया गएका एक जना नेपाली ८ वर्षसम्म पनि सम्पर्कमा नआएपछि परिवारमा झन् चिन्ता छाएको छ ।
कञ्चनपुरको भीमदत्त नगरपालिका बागवानीका दीपेन्द्र दमाई ८ वर्षदेखि सम्पर्कविहीन भएका हुन् । महाकाली ओभरसिज प्रालिबाट सन् २००३ मा उनी लेबर भिसामा मलेसिया पुगेको बताइएको छ ।
दीपेन्द्रसँगै मलेसिया पुगेका सबै साथी घर फर्कि सकेको भए पनि उनी भने अहिलेसम्म नफर्किएको उनका बुवा मानदेव दमाईले बताए । छोरो ज्युँदो छ कि छैन भनेर थाहा नभएको समेत उनको भनाई छ ।
मलेसिया पुगेको एक वर्षपछि छोरासित सम्पर्क हुन छाडेको उनका बुवाले गुनासो गरे । उनले सुरुमा पैसा पठाए पनि एक वर्षपछि भने केही खबर नआएको बताएको राससमा उल्लेख छ ।
दीपेन्द्रका बुवाका अनुसार उनले मलेसिया पुगेको नौ महिनापछि घरमा चिट्ठी पठाएर आराम रहेको जानकारी दिएका थिए । उक्त चिठीमा कम्पनीले मासिक २१ हजार रुपैयाँ तलब दिएको समेत उल्लेख रहेको जनाइएको छ ।
अहिले भने दीपेन्द्रका बुवा चिट्ठी खल्तीमा बोकर छोराको खोजीका भांैतारिरहेका छन् । मलेसियाबाट उनीसँगै गएका भतिजाहरु घर फर्केपछि उनले दीपेन्द्र सम्पर्कविहीन बनेको थाहा पाएका हुन् ।
प्रवासी नेपाली समन्वय समितिलाई खोजीका लागि सहयोग गरिदिन नेपालीले आग्रह गरेका छन् ।