काठमाडौं । सर्वोच्च अदालतले प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डविरुद्ध द्धन्द्धकालिन मुद्धामा परेको रिटमा कारण देखाऊ आदेश जारी गरेको छ ।
सर्वोच्च अदालतका न्यायाधीश ईश्वर खतिवडाको एकल इजलासले शुक्रबार १५ दिनभित्र आफैं उपस्थित भएर वा प्रतिनिधिमार्फत लिखित जवाफ दिन आदेश दिएको हो ।
निवेदक ज्ञानेन्द्रराज आरण लगायतले द्वन्द्वकालमा भएका हत्याका विषयमा माओवादी अध्यक्ष प्रचण्डलाई जिम्मेवार रहेको आरोप लगाउँदै सर्वोच्च अदालतमा रिट दायर गरेका थिए । तर ज्ञानेन्द्रराज आरणको माग बमोजिम अन्तरिम आदेश भने जारी भएको छैन । शुक्रबारको इजलासले मुद्दालाई अग्राधिकार दिन भनेको छ ।
द्धन्द्धकालिन मुद्दा संक्रमणकालिन न्यायको सिद्धान्त अनुसार टुंग्याउने बृहत शान्ति सम्झौतामा उल्लेख छ । फौजदारी कानुनका आधारमा अदालतमा पनि यस विषयले प्रवेश पाएपछि शान्ति सम्झौताकै विषयलाई लिएर कतिपयले प्रश्न उठाएको समेत पाइएको छ ।