काठमाडौँ । दर्जनौँ म्युजिक भिडियो अभिनय, सोही हाराहारी मिडिया अन्तर्वार्तामा छाउँदा पनि हिट नहुने थुप्रै व्यक्ति छन्, नेपाली कलाक्षेत्रमा । उनी भने एक म्युजिक भिडियोबाट रातारात चर्चित भएकी छन् ।

उनी अर्थात् कुशुम शर्मा, प्रकाश सपुतको बहुचर्चित सकम्बरी शीर्षक गीतकी फूलमाया ।

कुशुम अहिले फेसबुक, टिकटकलगायत सामाजिक सञ्जालको चारैतिर छाएकी छन् । सानादेखि ठुला मिडियासम्मले उनलाई फलो गर्न थालेका छन् । उनको अन्तर्वार्ता राखेर च्यानल हिट पार्ने र डलर झार्ने दाउमा युट्युबरसमेत पछि लागेका छन् । उनले अन्तर्वार्ता केमा दिने, केमा नदिने सोच्न सकेकी छैनन् । अन्तर्वार्ताका लागि आउने धेरै फोनलाई ‘अहिले बाहिर छु, पछि कुरा गर्छु नि’ भन्दै टार्नुपर्ने बाध्यता आइलागेको छ उनलाई ।

यतिबेला नेपाली सङ्गीतिक क्षेत्रमा सपुतको फूलमाया बोलको गीतले तहल्का पिटेको छ । वर्ष २०८० को पहिलो दिन अर्थात् वैशाख १ गते सार्वजनिक उक्त गीतको पक्ष र विपक्षमा एकातिर चर्चा परिचर्चा छ भने अर्काेतिर युट्युबमा ट्रेन्डिङमा १ नम्बरमा छ । दैनिक दश लाख दर्शक बढ्दो छ । सम्भवतः नेपालमा यति छिटो यति धेरै भ्युज पाउने यो पहिलो गीत हो ।

गीतको चर्चाको कारण शब्द, सङ्गीत र स्वरका अतिरिक्त भिडियोसमेत बनेको छ । सपुतकै निर्देशन रहेको भिडियोमा एउटी निर्दोष फूलमायालाई गलत मानिसहरुले कसरी सकम्बरी बनाइ दिन्छन् भन्ने कथा बुनिएको छ ।

भिडियोमा फूलमाया- सकम्बरीको भूमिकामा छिन् कुशुम । आफू अहिले फूलमाया- सकम्बरीको परिचयले चिनिएकी बताउँछिन् उनी । ‘गीत सार्वजनिक भएदेखि नै मलाई सबैले सकम्बरी भनेर चर्चा गरिरहेका छन्’, उनले भनिन् ‘अहिले नाम ओझेलमा छ ।’

अभिनयबाट सकारात्मक प्रतिक्रिया आइरहेको कुशुम सुनाउँछिन् । उनले थपिन्, ‘अभिनयको बेला गीत यतिको हिट हुन्छ भनेर सोचेकै थिइन् । त्यो हिसाबले पनि बढी खुसी छु ।’ -रातोपाटी

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।