अविरल वर्षाका कारण पहिरोको जोखिम बढेपछि पृथ्वी राजमार्ग र नारायणगढ–मुग्लिन सडकखण्ड अर्को सूचना जारी नभएसम्मका लागि बन्द गरिएको छ ।
बिहीबारदेखि परेको निरन्तर वर्षाका कारण विभिन्न स्थानमा पहिरो खसेको र थप पहिरोको जोखिम रहेकाले सडकमा सवारी आवागमन रोकिएको हो ।
प्रमुख जिल्ला अधिकारी गणेश अर्यालका अनुसार यसअघि बिहीबार राति ८ः०० बजेदेखि शुक्रबार बिहान ५ः०० बजेसम्म सडक बन्द गर्ने निर्णय गरिएको थियो । तर, वर्षा नरोकिएपछि अर्को सूचना जारी नभएसम्मका लागि सडक बन्द गरिएको हो ।
पृथ्वी राजमार्गका विभिन्न स्थानमा पहिरो खसेकाले चितवन खण्डमा समेत सवारी आवागमन रोकिएको प्रमुख जिल्ला अधिकारी अर्यालले जानकारी दिए ।
नारायणगढ–मुग्लिन सडकखण्ड हुँदै दैनिक १० हजारभन्दा बढी र पृथ्वी राजमार्ग हुँदै १४ हजारभन्दा बढी सवारीसाधन आवतजावत गर्ने गरेका छन् ।
