खोटाङ २१ फागुन । हावाहुरीले खोटाङका दर्जनौं घर, स्वास्थ्य संस्था तथा विद्यालयको छाना उडाएको छ । व्यक्तिको घर, विद्यालय, स्वास्थ्य संस्था, बोटबिरुवालाई क्षती पुग्दा लाखौंको नोक्सानी भएको छ । वर्षासँगै चलेको हावाहुरीले जालपास्थित जालपा सामुदायिक अस्पताल र स्वास्थ्यचौकी दोर्पाचिउरीडाँडाको छाना उडाएको छ । सामुदायिक अस्पतालको बरण्डाको छाना उडाएपछि बिरामीका कुरुवालाई बस्न असहज भएको अस्पताल सञ्चालक समितिका सदस्य प्रतिमान राईले बताए ।

हावाहुरीले उत्तरी गाबिस ज्यामीरेस्थित शान्तोद्धय माबि, सिद्ध प्राबि र कालिका प्राबिको छाना उडाएको जिल्ला शिक्षा कार्यालयले जनाएको छ । अन्य बिद्यालयमा पुगेको क्षतिको विवरण आउन बाँकी रहेको जिल्ला शिक्षा अधिकारी ज्ञानमणि नेपालले बताए ।

हावाहुरीले जालपा–३ का मिनुका राई, जालपा–४ का भीमबहादुर राई, हर्कबहादुर राई, जालपा–९ का राजमनी बिक र झनक श्रेष्ठको घरको छाना उडाएको छ । यस्तै, हावाहुरीले सप्तेश्वर–२ का धनबहादुर राईको घरको जस्ताको छाना उडाएको जिल्ला प्रहरी कार्यालय खोटाङका डिएसपी नबिनकिशोर प्रधानले बताए । हावाहुरी सँगै परेको चट्याङले छितापोखरी–६ का महासुर राईको दुई वटा गोरु मरेका छन् ।

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।