काठमाडौं १६ फागुन
वैदेशिक रोजगारीका नाममा फटाईदेखि ठगसम्मका कार्य गरेको प्रमाण बाहिर अाएपछि सरकारले दुई जना राजदूतमा सिफारिस महिलाको नाम फिर्ता लिएको छ । मेनपावरमा संलग्नलाई राजदूतमा सिफारिस गरेको र उनीहरुको चरित्र पनि ठिक नभएको भन्दै चौतर्फी विरोध बढेपछि सरकारले संयुक्त अरब इमिरेट्स (युएई) र ओमनका लागि राजदूत सिफारिस गरेका दुई महिलाको नाम फिर्ता लिने निर्णयमा पुगेको हो ।
मन्त्रिपरिषद् बैठकबाट कांग्रेसको कोटामा युएईमा राजदूत सिफारिस भएकी आशा लामा र मधेसी जनअधिकार फोरम लोकतान्त्रिकका तर्फबाट सिफारीस भएकी शर्मिला पराजुली ढकालको नाम सरकारले फिर्ता लिएको हो। यी दुई राजदूतबारे विवादास्पद प्रसंग र तथ्यहरू बाहिर आएपछि उनीहरूको सिफारिस फिर्ता लिएको प्रधानमन्त्री कार्यालयले जनाएको छ ।
प्रधानमन्त्रीका स्वकिय सचिव प्रकाश दाहालले केही दिन अगाडी नाम उल्लेख नगरी कांग्रेस र फोरमबाट सिफारिसको नाम खारेजीको अवस्थामा रहेको भन्दै सामाजिक सञ्जाल फेसबुकबाट सार्वजनिक गरेका थिए ।
विभिन्न देशमा १४ राजदुत सिफारीस भएको तेस्रो दिन नै सरकारले युएईका लागि सिफारीस भएकी लामा र ओमनका लागि सिफारीस ढकालको भने फिर्ता लिएको हो ।
सिफारीस निर्णयको तेस्रो दिन बुधबारै कांग्रेस सभापति शेरबहादुर देउवाले लामाको नाम फिर्ता लिन परराष्ट्रमन्त्री प्रकाशसरण महतलाई आफ्नै निवासमा बोलाएर निर्देशन दिएको समेत बताइन्छ ।
मन्त्रिपरिषद कार्यालयले संसदीय सुनुवाईका लागि लामा र ढकालबाहेक अन्य १२ जनाको नाम पठाउने तयारी गरेको छ ।
