सरकार–केसी नौबुँदे सहमति
काठमाडौं ११ साउन
चिकित्सा क्षेत्र सुधारको माग राखेर अनशन बसेका डा. गोविन्द केसीले माग पूरा गर्ने प्रतिवद्धतापछि बिहीबार राती अनसन तोडेका छन् ।
उपत्यकामा १० वर्ष मेडिकल कलेज खोल्न प्रतिबन्धसहितको नौबुँदे सहमतिपछि २७औं दिनमा अनशन तोडेका हुन् ।
उनको मुख्य मागमध्ये उपत्यकामा मेडिकल कलेज खोल्न नदिने तर उपत्यका बाहिर दिने एक थियो । दोस्रो, एउटै कलेजलाई ५ वटा भन्दा बढी शिक्षण संस्थाको सम्बन्धन दिन नहुने थियो । तेस्रो, सरकारी संस्थाले ७५ प्रतिशत निशुल्क छात्रावृत्ति हुनुपर्ने रहेको थियो । यी सबै माग विधेयक संशोधनमार्फत हल गर्ने सरकारको सहमति भएपछि केसीले अनसन तोडेका हुन् ।
सरकारी वार्ता टोली र केसीका प्रतिनिधिबीच बिहीबार राति १० बजेर २० मिनेटमा नौबुँदे सहमतिपत्रमा हस्ताक्षर भएको थियो भने साढे १० मा अनसन तोडेका थिए ।
यसअघि आशयपत्र प्राप्त गरी पूर्वाधार पूरा गरेका शिक्षण संस्थाले सरकारलाई सम्पत्ति हस्तान्तरण गर्न चाहेमा सरकारले उचित मुआब्जा दिई स्वामित्व ग्रहण गर्ने सहमति पनि भएको छ । त्यस्तै, उनीहरूलाई उपत्यकामा बाहिर जान चाहेमा सरकारले सुविधा दिइने भएको छ ।
सरकार र केसीबीचको सहमतिअनुसार मेडिकल कलेज सञ्चालन गर्न तीन वर्षसम्म आफ्नै अस्पताल पूर्ण रूपमा सञ्चालन गरेको समेत हुनुपर्ने भएको छ । ऐन प्रारम्भ हुनुअगावै आशयपत्र पाइसकेको भएमा सर्त तोकिएको अवधिभित्र पूरा नगरेमा त्यस्ता शिक्षण संस्थाको आशयपत्रसमेत नवीकरण नगरिने सहमति भएको छ ।
राष्ट्रिय चिकित्सा शिक्षा अध्यादेशमा सो व्यवस्था भए पनि सरकारले हटाएर संसद्मा विधेयक पेस गरेको थियो । त्यसलगत्तै डा. केसी अनशन बसेका थिए ।
