माघ २६ । उपाध्यक्ष वामदेव गौतमको नेतृत्वमा नेकपा एमाले सरकारमा जाने भएको छ ।
नयाँ बानेश्वरस्थित संविधानसभा भवनमा बसेको एमाले स्थायी कमिटी बैठकले गौतमको नेतृत्वमा सरकारमा जाने निर्णय गरेको हो ।
कांग्रेस र एमालेबीच भएको सम्झौता अनुसार एमालेले उप–प्रधान तथा गृह, स्थानीय विकास, सञ्चार सहितका मन्त्रालय पाउने छ । दुई दलबीच सरकारको भाग बन्डाको विषयमा भएको कुराकानी अनुसार दुईदल बाहेकका अन्यदल सरकारमा सहभागी हुँदा एमालेले ९ मन्त्रालय पाउने र दुईदलको मात्रै सरकार बन्दा प्रधानमन्त्री सहित १३ कांग्रेस र बाँकी १३ मन्त्रालय एमालेले पाउने गरी सहमति भएको छ । मौखिक सहमतिलाई कार्यान्वयन गर्दै  ७ दिनमा पूर्ण सरकार बनाउन पनि दुवै दल सहमत भएका छन् ।
सहमति अनुसार संविधानसभाको सभामुख पनि एमालेले नै पाउने छ । जसमा पूर्वसभामुख सुवासचन्द्र नेम्वाङको नाम अग्र पंक्तिमा छ । एमालेबाट उप–प्रधानसहित गृह मन्त्रालय सम्हाल्ने छन् भने सचिव विष्णु पौडेलले ऊर्जा मन्त्री हुने चर्चा छ ।
यता, प्रधानमन्त्रीसहित परराष्ट्र, अर्थ र रक्षा मन्त्रालय आफ्नो पार्टीको पोल्टामा पारेको कांग्रेसभित्र भने उपप्रधानमन्त्री पदमा चार नेता अघि सरेका छन् ।
महामन्त्रीद्वय प्रकाशमान सिंह, कृष्णप्रसाद सिटौलाले परराष्ट्रसहितको उपप्रधानमन्त्री मागेका छन् भने त्यस्तै नेतृ सुजाता कोइराला र नेता डा। रामशरण महतले पनि उपप्रधानमन्त्रीसहित परराष्ट्रमै रुचि देखाएको स्रोतको दाबी छ ।
Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।