पुस । एमाओवादी अध्यक्ष पुष्पकमल दाहालद्धारा माघ २ देखि सुरु हुने केन्द्रीय समिति बैठकमा प्रस्तुत हुने दस्तावेजमा बरिष्ठ नेता बाबुराम भट्टराईले असहमति जनाएका छन् ।भट्टराई निवास सानेपामा सोमबार बसेको उनी पक्षधर नेताहरुको भेलाले दाहालको दस्तावेजमा असहमति जनाउँदै आफ्नो कुरा कडा रुपमा केन्द्रीय समिति बैठकमा राख्ने निर्णय गरेको छ ।
समानुपातिक सभासद् छनौटमा केन्द्रीय समितिको निर्णय विपरित भएको र पार्टी पराजयको नैतिक जिम्मेवारी अध्यक्ष दाहालले लिनुपर्ने बाबुरामको पूर्व अडान कायमै रहने देखिएको हो ।
दाहालको दस्तावेजको विपक्षमा छुट्टै दस्तावेज लेख्ने या नलेख्ने बारेमा बाबुरामले अहिलेसम्म केही पनि खुलाएका छैनन् ।
बाबुराम पक्षले जसको विचार उसको नेतृत्व भन्ने विषयलाई पनि जोड दिंदै आएका छन् भने चुनावमा पराजयको जिम्मा पार्टीको उच्च तहबाट आत्मालोचना हुनुपर्ने माग समेत अघि सार्दै आएका छन् । तर यसअघि भट्टराईले आफू १ वर्षसम्म कुनै पदमा नबस्ने घोषणा भने गरिसकेका छन् ।
यसअघि पुस २६ गतेका लागि आह्वान गरिएको केन्द्रीय समितिको बैठक पनि एमाओवादी भित्रको आन्तरिक विवादका कारण माघ २ गतेलाई सारिएको थियो ।
Comments
