बहिनीको हत्या गर्ने दाजु पक्राउ

असार ६ । नुवाकोटको सामरी गाँउ विकास समिति–५ को गोर गाँउमा बहिनीको हत्या गर्ने दाजु पक्राउ परेका छन् ।

गएको जेठ ३० गते राति वीरबहादुर तामाङ बहिनी १५ वर्षीया सन्तुमाया तामाङको हत्यापछि फरार रहेका थिए । उनलाई आज काठमाडौँको बालाजुबाट पक्राउ गरिएको छ । राति खाना खाएर सुतेका दाजुबहिनी सम्पर्कविहीन भएपछि छिमेकीले खोजतलास गर्दा घरभन्दा केही पर खोल्सामा सन्तुमायाको टाउको छुट्टिएको अवस्थामा शव फेला परेको थियो ।

बाबुले दिएको किटानी जाहेरीका आधारमा प्रहरीले अनुसन्धानलाई तीव्र बनाएको थियो । घटनापछि फरार दाजु वीरबहादुरलाई जिल्ला प्रहरी कार्यालयको विशेष टोलीले आज बालाजुको गङ्गा हल छेउबाट पक्राउ गरेको हो । वीरबहादुरलाई आवश्यक कानुनी कारबाहीका लागि नुवाकोट ल्याइँदैछ । रासस