चैत २९ – भक्तपुरमा विस्केट जात्राको अवसरमा रथ तान्ने क्रममा मृत्यु हुनेको संख्या तीन पुगेको छ ।

८ रात ९ दिनसम्म धुमधामका साथ मनाइने उक्त पर्वमा ९ जना घाइते समेत भएका छन् ।

भक्तपुरको तौमढीमा भैरवको रथ तान्ने क्रममा किचिएर घाइते भएका एक जनाको मृत्यु भएपछि ज्यान जानको संख्या ३ पुगेको हो ।

रथ तानातानका क्रममा ज्यान गुमाउनेहरुमा भक्तपुर तौमढीका २२ बर्षका रुकेश शिल्पकार, २२ बर्षीय आशिष सुवाल र २३ बर्षका धीरेन्द्र शिल्पकार रहेका छन् ।

तौमढीबाट माथि र तलका बासिन्दाले आ–आफ्नो टोलमा रथलाई लैजान तान्ने क्रममा बुधबार राति करिब ९ बजे उनीहरुलाई रथले थिचेको थियो ।

घाइतेहरुको मध्यपुर अस्पताल, सिनामंगलस्थित केएमसी र महराजगंजस्थित शिक्षण अस्पतालमा उपचार भइरहेको बताइएको छ ।

Comments

  • हेलोखबरमा प्रकाशित कुनै पनि सामग्रीबारे केही गुनासो तथा सुझाव भए हामीलाई [email protected] मा पठाउन सक्नुहुनेछ । धन्यवाद ।