आमासहित छोराछोरीको शङ्कास्पद मृत्यु

पुस १३ – मोरङको उत्तरपूर्वी पहाडी गाविस टाँडी– ४ मा आमासहित दुई बालबालिका मृत अवस्थामा फेला परेका छन् ।

तीन वर्षकी छोरी र डेढ वर्षका छोरा बिहान झुण्डिरहेको अवस्थामा र आमाले पेटमा छुरा प्रहार गरिएको अवस्थामा मृत फेला परेको मोरङ प्रहरीले जनाएको छ ।

टाँडी–४ मा बस्ने लङ्का राईकी २५ वर्षीया श्रीमती माया राई, छोरी चाहना र छोरा आइडिएल मृत अवस्थामा भेटिएका हुन् ।

उक्त घटना आत्महत्या हो वा हत्या हो भन्ने सम्बन्धमा अनुसन्धान भइरहेको प्रहरीले जनाएको छ । लङ्का राई खेतमा काम गर्न गएको अवस्थामा परिवारका सदस्य मृत अवस्थामा फेला परेको राससले जनाएको छ ।

स्थानीय बासिन्दा एवम् छिमेकीका अनुसार आमा माया राई स्तन क्यान्सर पीडित थिइन् र आफ्नो बालबालिकाको स्याहारका लागि चिन्तित थिइन् ।