पछिल्लो समय नेपाली चलचित्र हेर्न दर्शक हलसम्म आउन निक्कै गाह्रो मानिरहेको अवस्थामा दशैं तिहारमा समेत त्यही चलन दोहोरिएपछि चाड पर्वमा पालो लगाउने निर्माताहरु हिस्स झै परेका छन् ।
कुनै पनि नेपाली चलचित्र प्रदर्शनका लागि दसैँ-तिहारको मौसमलाई राम्रो मान्ने गरिन्छ । यसरी दसैंको मौका पारेर चलचित्र निर्माताहरुले यसपटक चार चलचित्रहरु कार्तिक ३ गतेबाट प्रदर्शनमा ल्याए ।
दसैँ-तिहारको मौकामा सो सिम्पल, लूट कम्पनी, धुँवा यो नसा र के म तिम्रो साथी बन्न सक्छु प्रदर्शनमा आए । तर चलचित्र प्रदर्शनका लागि राम्रो मौसम मानिएको यो समयमा पनि दर्शकहरुको चाप हलमा नभएको हलवालाहरुको भनाई छ ।
हलवालाहरुका अनुसार दसैँमा प्रदर्शन भएका कुनै पनि चलचित्रले राम्रो ब्यापार गर्न सकेन । यस्तो समयमा पनि नेपाली चलचित्रले राम्रो ब्यापार गर्न नसक्दा चलचित्र कर्मी, निर्माता र हलवालाहरुबीच बहस चल्न थालेको छ ।
सो सिम्पलका निर्माता तथा कलाकार केशव भट्टराईसँग कुरा गर्दा उनले आफ्नो चलचित्रले केही हदसम्म राम्रो व्यापार गरेको बताए । उनले सो सिम्पललाई प्रदर्शनमा आएका अन्य चलचित्र भन्दा दर्शकले राम्रो प्रतिक्रिया दिएको डिसीनेपाललाई बताए ।
कार्तिक ३ गतेबाट राजधानीमा लूट कम्पनी र के म तिम्रो साथी बन्न सक्छु प्रदर्शनमा आएका थिए भने राजधानी बाहिर सो सिम्पल, के म तिम्रो साथि बन्न सक्छु र धुँवा यो नसा प्रदर्शन भएका थिए । अहिले सो सिम्पल राजधानीमा पनि प्रदर्शन भइरहेको छ । चलचित्र बितरक, निर्माता र हलवालाहरुका अनुसार अहिलेसम्मकै दसैँ मध्ये यसपालीको दसैँमा चलचित्रहरुले राम्रो ब्यापार गर्न सकेनन् ।