सिपी ढुङ्गाना (रासस)/पुस २ – आफू मरेपछि चाहिने वस्तुको जोहो जिउँदैमा गरेको सुन्दा अपत्यारिलो लाग्न सक्छ ।
कालिका गाविसका स्थानीयवासीले मर्नुअगावै मरेपछि घाटमा लैजाँदा प्रयोग गरिने कात्रो (सेतो कपडा) को जोहो गरेर राख्ने गरेका छन् । यो अनौठो लाग्ने प्रचलन ओखलढुङ्गा जिल्लाको पश्चिमी दुर्गम गाउँमा २०६७ सालदेखि सुरु भएको हो ।
स्थानीय कालिकादेवी विकास युवा मञ्च नामक क्लबको अगुवाइमा मान्छे मर्नु अगाडि नै कात्रोको जोहो गरेर राख्न थालिएको स्थानीय युवा विष्णुकुमार बुढाथोकीले जानकारी दिए । मान्छे मरेपछि सामाजिक परम्पराअनुसार कात्रो ओढाएर गरिने अन्तिम संस्कारका लागि कात्रो क्लबले व्यवस्था गर्ने गरेको बुढाथोकीको भनाई छ ।
दुर्गम गाउँ भएकाले नजिकमा कपडा पसल नहुँदा कात्रो किन्न एक दिन हिँडेर जानुपर्ने र लास दिनरात कुरेर बस्नुपर्ने गाउँको समस्या हल गर्न क्लबले नै गाउँमा आवश्यक पर्ने कात्रो किनेर जोहो गर्ने गरेको अर्का युवा विनोद कार्कीले बताए ।
क्लबले गाउँमा मान्छे मर्दा कात्रो मात्रा व्यवस्था गरेको छैन, क्रियामा बसेका क्रियापुत्री उकास्न रु पाँच हजारसमेत बिनाब्याज उपलब्ध गराउने गरेको छ । क्लबले बिरामी परेको समयमा उपचारका लागि निःशुल्क सापटी रकमसमेत उपलब्ध गराउने गरेको छ ।
स्थानीयस्तरमा उपचार सम्भव हुने बिरामीको उपचारका लागि रु तीन हजार र जटिल अवस्थाका बिरामीका लागि रु १० हजार उपचार खर्च ऋण सहायता गर्ने गरेको क्लबका अध्यक्ष रामहरि भुजेलले जानकारी दिए ।
भुजेलका अनुसार क्लबले देउसी खेलेर र गाविसको आर्थिक सहायतालगायत आम्दानीबाट स्थानीयवासीलाई सहयोग गर्दैआएको छ ।
विसं ०६७ मा क्लबको स्थापना भएपछि स्थानीयवासीलाई सहज भएको छ । गाउँमा मान्छे मरेको खण्डमा दिनभरि लगाएर कात्रो लिन रामेछापको साँघुटार बजार पुग्नुपर्ने बाध्यता टरेको स्थानीयवासी शिवराम बुढाथोकीले बताए ।
