काठमाडौं । प्रधानमन्त्री समेत रहेका नेकपा अध्यक्ष केपी शर्मा ओलीले अर्का अध्यक्ष पुष्पकमल दाहाल प्रचण्डलाई नै कित्ताकाट गर्न भनेको बुझिएको छ ।
बालुवाटारमा शुक्रबार भएको भेटमा प्रचण्डले कार्यकर्ता र जनताको भावना भनेको पार्टी एकता भएको भन्दै त्यसका लागि अहिलेसम्म जे जति त्याग भएको छ त्यो आफूबाट मात्र भएको भन्दै तपाईले के त्याग गर्नु भयो भनेर प्रश्न गरेका थिए ।
तर, प्रधानमन्त्री ओलीले त्याग र पार्टी एकताको विषयलाई छाडेर सयौं स्टेप अघि सर्दै प्रचण्डलाई उल्टो प्रश्न गरें, ‘अन्य च्याप्टर सबै बन्द भइसक्यो । अब प्रधानमन्त्री र अध्यक्षको कुरो रह्यो । पार्टी लगभग फुटेको अवस्थामा पुग्यो । बरु हामी सँगै जाने कि तपाईं माधव नेपालसँग जानुहुन्छ ?’
प्रचण्डले सोच्दै नसोचेको कुरा प्रधानमन्त्री ओलीबाट आएपछि प्रचण्ड चकित बनेका थिए । प्रचण्डले भेटमा पुनः एकतापछि चाहेको भए आफू प्रधानमन्त्री समेत हुने भन्दै अहिलेको अवसर ठूलो त्याग, बलिदान र कार्यकर्ताको भावनासँग जोडिएकाले आफूले पार्टी एकता गरेको भन्दै यस्तो अवस्थामा तपाईंले पार्टी एकताको मर्म र भावनाविपरित दायाँ बायाँ गर्न नपाउने बताएका थिए ।
प्रचण्डले त्यति भनेपछि ओलीले पुनः आफू प्रधानमन्त्री र अध्यक्ष कुनैबाट पनि राजीनामा नदिने पुरानै अडान दोहोर्याएका थिए । यसरी दुई अध्यक्षबीच नै अहिले पनि कुनै सहमति हुने देखिएको छ । नेकपाभित्रको विवाद भने उत्कर्षमा पुगेको छ ।
